BIZKAIMEDIA

Aldundiak Bizkairako Energia Estrategia Iraunkorra (BEEI 2020) onetsi du gaur Gobernu Kontseiluan.

Honela, foru erakundea osatzen duten sail guztiek energia aurrezteko eta modu eraginkorrean erabiltzeko politika eraginkorrak abian jarriko dira. Energia aurrezteko eta modu eraginkorrean erabiltzeko ekintza-lerro hau lurralde historiko osora zabalduko da, era berean.

Aldundiak energia berriztagarriaren sorrera bultzatu nahi du. Era berean, gure lurraldean aberastasuna eta garapen ekonomikoa sortu nahi ditu, ekonomia berdea argi eta garbi babestuz. Lurraldearen berezko energia-politika batek, administrazioak gidatua, EEE eta EUDELekin koordinatuta, energia aurreztea eta modu eraginkorrean erabiltzea sustatuko du, baita energia berriztagarriak sustatzea ere.

Nobedade horrek sail hau ingurumen organo gisa sendotzen du. Izan ere, uraren, hondakinen eta naturguneen kudeaketarako ez ezik, energia-politika ezinbestekoa da ingurumen politika integral baterako. Energiaren erabilera arduratsuarekin, era berean, gure inguruneko eta lurralde osoko ingurumenaren kalitatea hobetzen dugu.

Herritar arduratsuak eta administrazio eredugarria

Udalerriekin dauzkan harremanen bidez, aldundia Bizkaiko lurralde historiko osora eta bere herritar guztiengana iristen da. Horrela, bere energia-politika diseinatzerakoan, administrazio aktiboa da, eta energia-jokabide iraunkorrak motibatzen ditu, arauketa moderno baten bidez, fiskaltasun berdearen bidez eta erosketa publiko iraunkorraren bidez. Aldi berean, aldundiak energia sortzeko eta erabiltzeko pautak aplikatzen ditu, bere kontsumoak ezagutzen ditu eta jokabideak zuzentzeko jarduten du.

Bestalde, foru erakundeak energia Bizkaiko IHEPeko (Irisgarritasuneko Hezkuntzarako Ekintza Programako) zutabe bat izatea nahi du. Era berean, Aktiba zaitez + programa, gaur egun Durangaldean eta Arratian egiten dena, lurralde osora zabaltzeko konpromisoa hartzen du, BerrAktiba zaitez + ekimenaren bitartez. Tresna honek etxeetan eta ikastetxeetan energiaren kontsumoa murrizten laguntzen du.

Aldundiak 2050. urterako energia aldetik iraunkorra izan nahi du. Gainera, eredu fiskal berri baten alde eta ingurumen ikuspegitik erreforma fiskala egitearen alde egiten du apustu. Gainera, uste du beharrezkoa dela energia-kontratazio berdea kontuan izatea. Hau da, kontratazio pleguetan energiaren inguruko irizpideak sartzea. Administrazio eredugarria izateko, eko-garraioko ekimena ere aurkeztu du, hau da, garraio publiko eraginkorrago, garbiago eta iraunkorrago baten aldeko apustua.

Gure lurraldeko politikarik aurrerakoienen erakusgarri, Bizkaiak, Bizkaiener berrikuntza-ekimenaren bitartez, sektore berri hau aprobetxatu nahi du energian espezializatutako lurraldea izateko, merkatu globalean geure lekua aurkitzeko eta sektore eta jarduera guztietan lehiakorrak izateko. Azken izen horren bidez, energia iraunkorraren inguruan I+G+b-ko espezializazio inteligenteko lerro baten sustapena garatuko da.

Enpresekin eta energia-eraginkortasunarekin egindako beste apustu bat  lehiakorragoa izateko helburuz energia gutxiago kontsumitzen duen eredutik eratortzen da. Horretarako “Energiaren eko-eraginkortasuna. Energia gutxiago, lehiakortasun handiagoa” ekimena diseinatu dugu. Energia modu eraginkorrean erabiltzeak enpresen posizionamendua hobetuko du, baliabideen erabilera hobetuko delako eta energia-faktura murriztuko delako. Horrekin guztiarekin batera, ingurumeneko hobekuntzak egingo dira, energia garbia modu eraginkorrean erabiltzen duten kudeaketa-sistemei esker.